КОДЕКСИ ОДОБИ КАСБИИ КОРМАНДОНИ АГЕНТИИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯИ ҶУМҲУРИИ ТОҶИКИСТОН

20 фев. 2017

Бо фармони Директори

Агентии назорати давлатии

молиявӣ ва мубориза бо коррупсияи  Ҷумҳурии Тоҷикистон

аз «15» 03 соли 2016,

№ 146 тасдиқ шудааст

 

КОДЕКСИ

ОДОБИ КАСБИИ КОРМАНДОНИ АГЕНТИИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯИ ҶУМҲУРИИ ТОҶИКИСТОН

    Кодекси одоби касбии кормандони Агентии назорати давлатии молиявӣ ва мубориза бо коррупсияи  Ҷумҳурии Тоҷикистон   (минбаъд - Кодекс) маҷмўи меъёрҳо, принсипҳо ва қоидаҳои рафтори хизматӣ ва ғайрихизматии хизматчиёни давлатии Агентии назорати давлатии молиявӣ ва мубориза бо коррупсияи  Ҷумҳурии Тоҷикистон  (минбаъд-Агентӣ) мебошад, ки  сифатҳои ахлоқии фаъолияти касбии онҳоро   таҷассум намуда, ифодагари арзишҳои эътирофшудаи ахлоқи инсонӣ, талаботи маънавии ҷамъият нисбат ба хизмати давлатӣ  мебошад.

БОБИ 1. МУҚАРРАРОТИ УМУМӢ

    1. Муқаррароти Кодекси мазкур нисбат ба хизматчиёни давлатӣ, ки мансабҳои давлатии хизмати давлатиро дар Агентӣ мутобиқи Қонуни Ҷумҳурии Тоҷикистон "Дар бораи хизмати давлатӣ" ва дигар санадҳои меъёрии ҳуқуқӣ ишғол менамоянд, татбиқ мегардад.

     2. Шаҳрванди Ҷумҳурии Тоҷикистон, ки ба хизмати давлатӣ дар Агентӣ дохил мешавад, ба Кодекси мазкур шинос шуда, вазифадор аст талаботи онро ҳангоми амалӣ намудани фаъолияти хизматӣ ва ғайрихизматӣ риоя намояд.

*Эзоҳ: Рафтори хизматӣ - рафтору амал ва муносибати хизматчии давлатӣ дар Агентӣ, ки ҳангоми ба кор омадан, аз кор рафтан, иҷрои ўҳдадориҳои мансабӣ, иштирок дар маҷлису машваратҳо, сафарҳои хизматӣ ва дигар чорабиниҳои давлатӣ зоҳир мегардад.

**Эзоҳ: Рафтори ғайрихизматӣ - рафтору амал ва муносибати хизматчии давлатӣ, ки ба иҷрои ўҳдадориҳои мансабӣ  иртибот надошта, берун аз ҷои кор дар ҷомеа зоҳир мегардад.

БОБИ 2. ПРИНСИПҲОИ АСОСИИ ОДОБИ ХИЗМАТИ ДАВЛАТӢ ДАР АГЕНТӢ

    3. Кодекси мазкур ба принсипҳои зерини одоби хизматчии давлатӣ, ки аз принсипҳои хизмати давлатӣ бармеоянд, асос меёбад ва хизматчии давлатӣ дар Агентӣ ўҳдадор аст дар фаъолияти хизматӣ ва ғайрихизматӣ онҳоро ба роҳбарӣ гирад:

    - қонуният - риояи дақиқ ва иҷрои пурраи меъёрҳои Конститутсияи (Сарқонуни) Ҷумҳурии Тоҷикистон, қонунҳо ва дигар санадҳои меъёрии ҳуқуқӣ, санадҳои ҳуқуқии байналмилалие, ки Тоҷикистон онҳоро эътироф кардааст;

    - афзалияти ҳуқуқу озодиҳои инсон ва шаҳрванд - таъмини ҳифз ва мусоидат ба амалишавии ҳуқуқу озодиҳои инсон ва шаҳрванд, ки арзиши олӣ мебошанд;

    - садоқат ба Ватан ва ба халқи Тоҷикистон - ҳисси муҳаббат ба Ватан ва халқи Тоҷикистон, садоқат ба сиёсати Президенти Ҷумҳурии Тоҷикистон ва Ҳукумати Ҷумҳурии Тоҷикистон, вазифаи муқаддас донистани ҳифзи Ватан, хизмати содиқона ба Ватан ва ҷомеаи Тоҷикистон;

    - инсондўстӣ ва адолати иҷтимоӣ - эҳтиромона муносибат намудан ба инсон, ҳуқуқ ва озодиҳои он, ки арзиши олӣ мебошанд, одилона, бовиҷдонона амал намудан, таъмини риояи адолати иҷтимоӣ зимни қабули қарорҳо;

   - шаффофият дар хизмати давлатӣ - фаъолияти шаффофи хизматчии давлатӣ ва пешниҳоди маълумот дар бораи он ба ҷомеа, аз ҷумла тавассути воситаҳои ахбори омма, ба ҷуз фаъолият ва маълумоте, ки сирри давлатӣ ва дигар сирри бо қонун ҳифзшавандаро ташкил медиҳад;

   - таҳаммулпазирӣ - эҳтиром ва дуруст дарк намудани фарҳангҳои мухталиф, рафтор, одат, ақида, дин, эҳтиромона муносибат намудан бо ҳамкорон, муроҷиаткунандагон, тобеон ва ҷомеа;

    - поквиҷдонӣ ва беғаразӣ - татбиқи идоракунии самаранок, роҳ надодан ба бархўрди манфиатҳо, амалҳои коррупсионӣ, аз рўи таъинот ва ба нафъи умум истифода кардани воситаҳои моддию пулӣ, беғараз будан дар қабули қарорҳо;

    - қатъият - муносибати сахтгирона доштан ва масъулият зоҳир кардан дар татбиқи вазифаҳои мақомоти давлатӣ ва ўҳдадориҳои мансабӣ;

   - касбият ва салоҳиятнокии хизматчии давлатӣ - доштани донишҳои мушаххаси касбӣ, тахассус, маҳорат, малака, сифатҳои ташкилотчигӣ, ташаббускорӣ, шахсӣ, қобилияти идоракунӣ, маҳорати роҳбарӣ ва ботаҷрибагӣ, ки асоси иҷрои муваффақонаи вазифаҳои мақомоти давлатӣ ва ўҳдадориҳои мансабӣ мегарданд;

    - баландравии мансабии хизматчии давлатӣ дар асоси қобилият, истеъдод, тайёрии касбӣ ва талаботи тахассусӣ - таъин гардидан ба мансаби дигар ё мансаби баланд бе роҳ додан ба хешутаборчигӣ, маҳалгароӣ ва пуштибонӣ ҳамчун зуҳуроти кирдорҳои коррупсионӣ.

    4. Кодекси мазкур ба дигар принсипҳои пешбининамудаи санадҳои меъёрии ҳуқуқӣ ва меъёрҳои муқарраргардидаи рафтор низ асос меёбад.  

БОБИ 3. ҚОИДАҲОИ РАФТОРИ ХИЗМАТӢ ВА ҒАЙРИХИЗМАТИИ ХИЗМАТЧИЁНИ ДАВЛАТИИ АГЕНТӢ

    5. Хизматчии давлатӣ дар Агентӣ бояд:

    -ҳуқуқу озодиҳои инсон ва шаҳрвандро эътироф, эҳтиром, риоя ва ҳифз намояд, ба таърихи кишвари худ, ба урфу одатҳои миллӣ ва фарҳангӣ эҳтиромона муносибат намояд, манфиати давлатро аз манфиати шахсӣ боло гузорад ва нисбати муроҷиати шаҳрвандон бодиққат ва бомасъулият муносибат кунад;

     -аз истифодаи мақоми хизматӣ, зуҳури ғарази шахсӣ ва худнамоӣ дар нуқтаҳои савдо, хизматрасонӣ ва дигар чойҳои ҷамъиятӣ худдорӣ намояд;

   -маъракаҳои бодабдаба, ки бархилофи қонунгузорӣ оид ба танзими анъана ва ҷашну маросимҳо сурат мегирад, нагузаронад ва ба сўйистеъмоли нўшокиҳои спиртӣ роҳ надиҳад;

     -аз таъсири шаҳрвандони алоҳида, гурўҳҳои иҷтимоӣ, ҳизбҳои сиёсӣ ва ташкилотҳои ҷамъиятӣ вобаста набошад.

   6. Хизматчии давлатӣ дар Агентӣ бояд одилона амал намояд. Ҳангоми қабули қарор ва амалӣ намудани ваколатҳои худ хизматчии давлатӣ ҳуқуқ надорад, ки дар асоси мансубияти миллӣ, нажодӣ, ҷинсӣ, забонӣ, эътиқоди динӣ, мавқеи сиёсӣ, таҳсил, вазъи иҷтимоӣ, молу мулк ва дигар асосҳо ба шахсе хилофи қонунгузорӣ бартарият ва имтиёз диҳад.

   7. Хизматчии давлатӣ дар Агентӣ бояд ба урфу одатҳои миллатҳо таҳаммулпазирӣ ва арҷгузорӣ намуда, хусусиятҳои фарҳангӣ ё дигар хусусиятҳои гурўҳҳои этникӣ ва иҷтимоиро ба инобат гирифта, ба созиши байни миллатҳо мусоидат намояд.

   8. Хизматчии давлатӣ дар Агентӣ бояд дар фаъолияти касбии худ поквиҷдонона ва беғаразона амал намуда, ба шаъну шараф, обрўю эътибори хизматчии давлатӣ ва мақомоти давлатӣ иснод наоварад.

   9. Хизматчии давлатӣ дар Агентӣ, ки вазифаи намояндаи ҳокимияти давлатиро ба ҷо меоварад ё ваколатҳои ташкилию амрдиҳӣ ва ё маъмурию хоҷагидориро анҷом медиҳад, ўҳдадор аст, ки ҳангоми интихоб ва ҷобаҷогузории кадрҳо  ба хешутаборчигӣ, маҳалгароӣ ва пуштибонӣ,  ҳамчун зуҳуроти кирдорҳои коррупсионӣ роҳ надиҳад.

   10. Хизматчии давлатӣ дар Агентӣ, ки мансаби роҳбарикунандаро ишғол менамояд, бояд ҷиҳати риояи одоб ва ташкили шароити мувофиқ барои кори тобеони худ мусоидат намояд.

   11. Хизматчии давлатӣ дар Агентӣ набояд то қабул намудани қарор, фармоиш, амр ё дигар қарори шахси мансабдор, маълумотро дар бораи онҳо, ҳамчунин иттилооти нопурра ва дурўғро паҳн намояд ва ё барои гирифтани иттилооти хизматӣ, ки ба ваколати ў дохил намешавад, кўшиш кунад.

   12. Хизматчии давлатӣ дар Агентӣ дар доираи ўҳдадориҳои мансабии худ бояд ба фаъолияти воситаҳои ахбори омма оид ба иттилоотонии ҷомеа дар бораи кори мақоми давлатӣ барои гирифтани иттилооти дақиқ, ки қонунгузорӣ пешбинӣ кардааст, мусоидат намояд.

   13. Хизматчии давлатӣ дар Агентӣ набояд пешниҳоди шаҳрвандон, гурўҳҳои иҷтимоӣ, ташкилотҳои касбӣ, намояндагони воситаи ахбори омма, ҳизбҳои сиёсӣ ва ташкилотҳои ҷамъиятиро, ки ба талаботи Конститутсия ва дигар санадҳои меъёрии ҳуқуқии Ҷумҳурии Тоҷикистон мухолифанд, қабул намояд.

   14. Хизматчии давлатӣ дар Агентӣ бояд ҷиҳати роҳ надодан ба бархўрди манфиатҳо, танзими ҳолатҳои пайдошудаи бархўрди манфиатҳо мувофиқи қонунгузории Ҷумҳурии Тоҷикистон чора андешад ва ҳаракатҳоеро, ки ба таъсири манфиатҳои шахсӣ, молу мулкӣ (молиявӣ), тиҷоратӣ ва дигар манфиатҳо иртибот доранд ва барои бовиҷдонона иҷро кардани ўҳдадориҳои мансабӣ монеа мешаванд, истисно намояд.

    15. Хизматчии давлатӣ дар Агентӣ бояд ба кирдорҳои коррупсионӣ муқовимат намояд, ҷиҳати пешгирӣ ва рафъи онҳо тадбирҳо андешад, ба гирифтан ва додани ҳар гуна тўҳфаҳо барои иҷрои вазифаҳои мақомоти давлатӣ ва ўҳдадориҳои мансабии худ, аз ҷумла ҳангоми дар сафари хизматӣ дар шакли моддӣ (пул, тўҳфа) ва дар шакли ғайримоддӣ (хизматрасонӣ), ба истиснои ҳолатҳои пешбининамудаи қонунгузорӣ, роҳ надиҳад.

    16. Хизматчии давлатӣ дар Агентӣ бояд ба воситаи роҳбари бевоситаи худ ба Директори Агентӣ  дар бораи муроҷиати шахсон бо мақсади моил кардани ў барои содир намудани кирдорҳои коррупсионӣ маълумот диҳад ва аз иштирок дар амалҳое, ки беғаразии ў зери шубҳа қарор мегирад, даст кашад.

   17. Хизматчии давлатӣ дар Агентӣ набояд вазъи хизматии худро барои таъсир расонидан ба фаъолияти мақомоти давлатӣ, мақомоти худидоракунии шаҳрак ва деҳот, корхонаҳо, муассисаҳо ва дигар ташкилотҳо, новобаста аз шакли ташкилию ҳуқуқӣ ва моликият, шахсони мансабдор, хизматчиёни давлатӣ ва шаҳрвандон суйистифода намояд, дар аҳдҳо ва вазъияти ихтилофнок иштирок намояд.

    18. Хизматчии давлатӣ дар Агентӣ бояд воситаҳои давлатии (шабакаи Интернет, шабакаи дохилӣ, почтаи электронӣ, телефон, факс, нусхабардор, дигар таҷҳизот, воситаҳои нақлиёти хизматӣ, арзишҳои моддию ғайримоддии) ба ў пешниҳодшударо барои манфиатҳои хизматӣ истифода намояд.

    19. Хизматчии давлатӣ дар Агентӣ ўҳдадор аст интизоми давлатӣ ва хизматиро қатъиян риоя намояд,

    20. Хизматчии давлатӣ дар Агентӣ набояд фикри худро оид ба масъалаҳои сиёсати давлатӣ ва фаъолияти хизматӣ баён намояд, агар он:

    - ба самтҳои асосии сиёсати давлат мувофиқ набошад;

    - иттилооти хизматиро паҳн кунад, ки барои ба маълумоти умум расонидани он иҷозат набошад ё сирри давлатӣ ва сирри дигари бо қонун ҳифзшаванда бошад;

    - нисбат ба шахсони мансабдори давлатӣ ифодаҳои аз одоб берунро доро бошад.

    21. Хизматчии давлатӣ дар Агентӣ бояд дар муносибатҳои хизматӣ ва ғайрихизматӣ хоксору хушмуомила бошад.

    22. Хизматчии давлатӣ дар Агентӣ бояд дар фаъолияти худ санъати сухан, қоидаҳои умумии муошират ва пўшидани либосро мутобиқи расмиёти одоби корӣ риоя кунад.

    23. Хизматчии давлатӣ дар Агентӣ бояд ба ташрифоварандагон таваҷҷўҳ карда, ба арзи онҳо таҳаммулпазирона муносибат намояд ва ба онҳо тартиби баррасии муроҷиатҳо ва қонунгузории дахлдорро фаҳмонда, дар доираи салоҳият қарор қабул намояд.

    24. Хизматчии давлатӣ дар Агентӣ ҳуқуқ дорад бо шаҳрвандони хориҷӣ танҳо бо тартиби муқарраршуда мулоқоти корӣ ва гуфтушунид гузаронад, бояд ҳангоми муошират бо шаҳрвандони хориҷӣ обрўйи мақомоти давлатӣ ва Ҷумҳурии Тоҷикистонро паст назанад, масъалаҳои ба доираи ўҳдадориҳои мансабӣ дохилнабударо муҳокима нанамояд.  

БОБИ 4. НАЗОРАТИ  РИОЯИ КОДЕКСИ ОДОБИ КАСБӢ, ТАРТИБИ ТАШКИЛ ВА ФАЪОЛИЯТИ КОМИССИЯ ОИД БА ОДОБ

    25. Назорати риояи Кодекси мазкур дар Агентӣ аз тарафи комиссия оид ба одоби хизматчии давлатӣ (минбаъд-комиссия) амалӣ карда мешавад.

    26. Комиссия бо фармони Директори Агентӣ  дар ҳайати раис, муовин, аъзои комиссия иборат аз 7 нафар, аз ҷумла котиби масъули комиссия (бо ҳуқуқи овоз додан) таъсис дода мешавад ва мувофиқи тартиби муқаррарнамудаи Кодекси мазкур ва Низомномаи комиссия, ки аз тарафи Директори Агентӣ тасдиқ карда мешавад, фаъолият менамояд. Яке аз муовинони Директори Агентӣ  ба ҳайси раиси комиссия интихоб карда мешавад.

    27. Номзадҳо ҷиҳати ворид (бозхонд) ба (аз) ҳайати комиссия дар ҷаласаи ҳайати мушовараи Агентӣ ба Директори Агентӣ  пешниҳод карда мешаванд.

    28. Аъзои комиссия дар ҷаласа бе ҳуқуқи ивазшавӣ иштирок мекунад.

    29. Комиссия аз рўи асосҳои зерин ҷаласа доир менамояд:

    - дастури Директори Агентӣ;

    - муроҷиати хизматчии давлатӣ;

    - муроҷиати хаттии шаҳрвандон;

    - дар мавриди аз тарафи комиссия ошкор намудани ҳолатҳои вайрон гардидани талаботи Кодекси мазкур.

    30. Ҷаласаҳои комиссия дар 3 моҳ як маротиба ва ё бе маҳдудияти мўҳлат аз рўи зарурат гузаронида мешаванд.

    31. Комиссия ҷаласаи худро дар муддати 14 рўзи корӣ аз рўзи ошкор шудани ҳолатҳои вайрон гардидани талаботи Кодекси мазкур мегузаронад.

    32. Ҷаласаи комиссия ҳамон вақт салоҳиятнок ҳисобида мешавад, ки дар кори он аз се ду ҳиссаи ҳайати он иштирок дошта бошанд.

    33. Комиссия аз ҳисоби аъзои комиссия оид ба масъалаи дар ҷаласаи комиссия баррасишаванда маърўзачиро муайян менамояд ва аз шахсони дахлдор оид ба ҳолати вайрон гардидани қоидаҳои Кодекси мазкур баёнот мегирад.

    34. Комиссия дар доираи салоҳияти худ аз натиҷаи муҳокима яке аз қарорҳои зеринро қабул намуда, ба Директори Агентӣ пешниҳод менамояд:

    - дар бораи ба ҷавобгарии интизомӣ кашидани хизматчии давлатӣ;

    -дар бораи фиристодани мавод ҷиҳати баррасӣ ба мақоми ваколатдори давлатӣ;

    - дар бораи қатъ намудани баррасӣ.

    35. Қарори комиссия дар ғоибии хизматчии давлатӣ бо овоздиҳии аксарияти иштироккунандагони ҷаласа қабул карда мешавад. Ҳангоми баробар будани овозҳо овози раиси комиссия ҳалкунанда ҳисоб меёбад.

   36. Рафти ҷаласаи комиссия ва қарори он бо протокол ба расмият дароварда мешавад. Дар рафти ҷаласа мумкин аст сабтҳои аудиоӣ ва видеоӣ истифода гарданд, ки онҳо низ ба протокол замима карда мешаванд.

    37. Ба протокол раис ва котиби комиссия имзо мегузоранд.

    38. Қарори комиссия ба Директори Агентӣ пешниҳод карда шуда, барои татбиқи муҷозоти интизомӣ тибқи қонунгузорӣ асос мегардад.

    39. Директори Агентӣ дар мавриди ошкор намудани ҳолатҳои нопуррагӣ ё вайрон кардани талаботи Кодекси мазкур метавонад маводро ҷиҳати баррасии иловагӣ ё такрорӣ ба комиссия баргардонад.

    40. Нисбати қарори комиссия  дар давоми як моҳи эътибори қонунӣ пайдо намудан ба комиссия, Директори Агентӣ ё суд шикоят кардан мумкин аст, агар қонунгузории Ҷумҳурии Тоҷикистон тартиби дигареро муқаррар накарда бошад.

    41. Ҳангоми баррасии шикоят, дар сурати ошкор шудани ҳолати риоя нагардидани тартиби муқарраргардидаи қонунгузорӣ ба комиссия   дар бораи бекор кардани қарори қабулшуда пешниҳод манзур карда мешавад.

    42. Ба вазифаҳои комиссия дохил мешаванд:

    - амалӣ намудани назорати иҷрои муқаррароти Кодекси мазкур;

    - баррасии ҳолатҳои вайрон намудани муқаррароти Кодекси мазкур аз тарафи хизматчиёни давлатӣ дар Агентӣ;

    - гузаронидани санҷиш ва рейдҳои ногаҳонӣ дар Агентӣ;

    - доир намудани ҷаласаҳои комиссия;

    - гирифтани баёноти шифоҳӣ ва хаттӣ аз хизматчиёни давлатии дахлдор оид ба масъалаи баррасишаванда;

    - бо тартиби муқарраргардида талаб намудани ҳуҷҷатҳо, мавод ва иттилоот аз мақомоти давлатӣ ва ташкилотҳои дахлдор;

    - ҷалб намудани коршиносон (экспертҳо), мутахассисон ва кормандони дахлдори мақоми давлатӣ барои пешниҳоди хулоса;

    - баррасии шикоятҳои хизматчиёни давлатӣ нисбат ба қарорҳои комиссия;

    - машварат додан ба хизматчиёни давлатӣ оид ба масъалаҳои одоб;

    - гузаронидани чорабиниҳои омўзишии Кодекси мазкур;

    - фаҳмондадиҳии муқаррароти Кодекси мазкур.

    43. Раиси комиссия:

     - фаъолияти комиссияро ташкил менамояд ва онро роҳбарӣ мекунад;

    - рўзномаи ҷаласаи комиссияро муайян мекунад;

    - ҷаласаи комиссияро даъват менамояд ва ба он раисӣ мекунад;

    - кормандони Агентиро, ки баррасии масъала ба ваколати онҳо мансуб аст, ба кори комиссия ҷалб менамояд;

    - дар хусуси ворид намудан ба ҳайати комиссия ё бозхонди аъзои он ба мушовараи Агентӣ ё Директори Агентӣ таклиф пешниҳод менамояд;

    - ба ҳуҷҷатҳои комиссия ва протоколи ҷаласаи комиссия имзо мегузорад.

    44. Котиби комиссия:

    - кори комиссияро дар мувофиқа бо раиси комиссия ташкил мекунад;

    - коргузории комиссияро пеш мебарад;

    - хизматчии давлатиро бо маводҳое, ки нисбаташ баррасӣ мегарданд, на дертар аз 3 рўз то оғози ҷаласаи комиссия шинос менамояд;

    - дар бораи ҷой ва вақти гузаронидани ҷаласаи комиссия аъзои комиссия ва шахсонеро, ки нисбати онҳо ва аз рўи муроҷиати онҳо мавод баррасӣ карда мешавад, хабардор менамояд;

    - протоколи ҷаласаи комиссияро тартиб медиҳад ва ба он имзо мегузорад;

    - хизматчии давлатиро бо қарори комиссия дар давоми 1 рўзи корӣ ва қарори Директори Агентӣ дар давоми 3 рўзи корӣ шинос менамояд;

    - чорабиниҳои омўзишии Кодекси мазкурро ташкил мекунад;

    - фаҳмондадиҳии муқаррароти Кодекси мазкурро ба роҳ мемонад;

    - фаъолияти комиссияро тарғиб менамояд.

    45. Маводҳо оид ба вайрон кардани қоидаҳои Кодекси мазкур нисбат ба аъзои комиссия, ба истиснои хизматчиёни давлатии сиёсӣ ва маъмурии категорияи олӣ, аз тарафи ҳайати мушовараи Агентӣ  баррасӣ карда мешаванд.

БОБИ 5. МУҚАРРАРОТИ ХОТИМАВӢ

    46. Риояи қоидаҳои Кодекси мазкур ўҳдадории хизматчии давлатӣ буда, риоя накардани он боиси ҷавобгарии муқаррарнамудаи қонунгузории Ҷумҳурии Тоҷикистон мегардад.

   47. Риояи меъёрҳои одоби рафтори хизматӣ ҳангоми гузаронидани аттестатсия, баҳодиҳии фаъолият, иштирок дар озмун, таъин (интихоб) кардани хизматчии давлатӣ ба мансаб, бо мукофотҳо сарфароз гардонидан, рутба додан, дохил  кардан ба захираи кадрҳо барои ишғоли мансаби баландтар, таҳияи тавсифнома ё тавсиянома ва ҳангоми ба ҷавобгарии интизомӣ кашидан, ба инобат гирифта мешаванд.

    48. Директори Агентӣ бояд барои пешгирии вайрон намудани қоидаҳои Кодекси мазкур тадбирҳои зеринро андешад:

    - дар асоси пешниҳоди комиссия бо тартиби муқарраркардаи Қонуни Ҷумҳурии Тоҷикистон "Дар бораи хизмати давлатӣ" ва “Оинномаи интизомии воҳидҳои ҳифзи ҳуқуқи Агентӣ” татбиқ намудани муҷозоти интизомӣ;

      - гузаронидани машварату семинарҳо дар бораи омўзиши Кодекси мазкур;

     - андешидани дигар чораҳое, ки қонунгузории Ҷумҳурии Тоҷикистон манъ накардааст.

    49. Ҳангоми дар амалу кирдорҳои хизматчии давлатӣ дар Агентӣ мавҷуд будани аломатҳои таркиби ҷиноят ё кирдорҳои ҳуқуқвайронкунии маъмурӣ, ки баррасии онҳо салоҳияти дигар мақомоти давлатӣ мебошанд, маводи дахлдор бо тартиби муқарраргардида ба мақомоти дахлдори ҳифзи ҳуқуқ ҷиҳати ба ҷавобгарии ҷиноятӣ кашидан ва ё ба мақомоти ваколатдори давлатӣ ҷиҳати ба ҷавобгарии маъмурӣ кашидан фиристода мешаванд.

Научные публикации

(
)