Иқтибос аз Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 26.12.2018 | Мо соли ҷорӣ бо мақсади бартараф намудани санҷишҳои беасосу такрорӣ ва фароҳам овардани фазои мусоид барои рушди соҳибкорӣ ба ҳама гуна санҷишҳои фаъолияти соҳибкорони истеҳсолӣ дар давоми ду сол мораторий эълон намудем, ки аз он қариб 2000 субъектҳои соҳибкорӣ дар соҳаҳои истеҳсолӣ бархурдор гардиданд. | Барои тақвият бахшидан ба ин раванд, зарур мешуморам, ки солҳои 2019-2020 тамоми санҷишҳои фаъолияти субъектҳои соҳибкорӣ дар соҳаҳои истеҳсолӣ манъ карда, муқаррароти Қонуни Ҷумҳурии Тоҷикистон “Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ” ба ҳамаи мақомоти санҷишу назорат ва ҳифзи ҳуқуқ, аз ҷумла Прокуратураи генералӣ, Палатаи ҳисоб, Агентии назорати давлатии молиявӣ ва мубориза бо коррупсия, Бонки миллӣ ва мақомоти андозу гумрук татбиқ карда шаванд. | Ба роҳ мондани муборизаи қатъӣ бо амалҳои коррупсионӣ шарти муҳимми фароҳам овардани фазои ҳамдигарфаҳмӣ дар ҷомеа ва таҳкими эътимоди мардум нисбат ба сохтору мақомоти давлатӣ мебошад. | Бинобар ин, Агентии назорати давлатии молиявӣ ва мубориза бо коррупсия, Палатаи ҳисоб, Прокуратураи генералӣ ва дигар субъектҳои ваколатдори соҳа бояд ҳамкориро бо аҳолӣ беҳтар ба роҳ монда, ҷиҳати гузоштани садди устувор дар роҳи амалҳои коррупсионӣ тадбирҳои муассир андешанд. | Ҳамзамон бо ин, якҷо бо Вазорати адлия лоиҳаи Қонуни Ҷумҳурии Тоҷикистон “Дар бораи мубориза бар зидди коррупсия”-ро, ки соли 2005 қабул шудааст, вобаста ба шароити имрӯза дар таҳрири нав таҳия ва пешниҳод намоянд. | Таъмин намудани тартиботи ҳуқуқӣ, амнияти давлат, суботу оромии ҷомеа, ҳифзи ҳуқуқу озодиҳои инсон ва шаҳрванд, инчунин, мубориза бо ҷинояткорӣ вазифаи бевоситаи хизматӣ ва қарзи виҷдонии ҳар як корманди мақомоти ҳифзи ҳуқуқ ба ҳисоб меравад. | Аз ин рӯ, тамоми кормандони мақомоти судӣ, прокуратура, корҳои дохилӣ, амният, агентиҳои назорати маводи нашъаовар, назорати давлатии молиявӣ ва мубориза бо коррупсия бо мақсади таъмин намудани тартиботи ҷамъиятӣ, суботу оромии ҷомеа, пешгирӣ ва сари вақт ошкор кардани ҷиноятҳо, муайян ва бартарафсозии сабабу омилҳои содиршавии онҳо чораҳои ҷиддӣ андешанд. | Барои расидан ба ин ҳадафҳо кормандони мақомоти ҳифзи ҳуқуқ бояд, пеш аз ҳама, худашон талаботи қонунҳоро дар кору фаъолияти хеш қатъиян риоя намоянд ва дар иҷрои вазифаҳои хизматӣ намунаи ибрат бошанд. |

Суханронӣ дар мизи мудаввар дар доираи Форуми дуюми байналмилалии «Як камарбанд, як роҳ»

 

Муҳтарам Раис,
Муҳтарам сарони давлатҳо ва роҳбарони ҳайатҳо,
Хонумон ва ҷанобон!

Тоҷикистон ба татбиқи бомуваффақияти Ташаббуси «Як камарбанд, як роҳ» аҳамияти хос медиҳад ва ба ҳамкории судманд дар доираи ин лоиҳа бо ҳамаи кишварҳои манфиатдор омода аст.

Ташаббуси мазкур метавонад ба Тоҷикистон дар татбиқи Стратегияи миллии рушд барои давраи то соли 2030 ва ноил шудан ба Ҳадафҳои рушди устувор мусоидат намояд.

Иштироки Тоҷикистон дар ин ташаббус, ҳамчун кишваре, ки ба баҳр баромад надорад, ба рушди иқтидори транзитии он мусоидат менамояд.

Мо ҳамчунин ба афзоиши ҳаҷми савдои хориҷӣ, кам кардани хароҷот ва муҳлати интиқоли мол умед дорем.

Илова бар ин, татбиқи ин лоиҳаи густурда ба Тоҷикистон имкон медиҳад, ки бо хатсайрҳои манфиатовар тавассути долонҳои нақлиётиву иқтисодӣ ба бозорҳои нав дастрасӣ пайдо кунад; даромадҳои иловагиро тавассути пешбурди саноатикунонӣ-таъсиси корхонаҳои нав ба даст орад.

Ҳадафи мо дар соҳаи транзитию нақлиётӣ – ин фароҳам овардани шароити мусоид барои хатсайрҳои байналмилалии мошингард, ҳавоӣ ва роҳи оҳан миёни мамлакатҳоямон мебошад.

Дар ин самт мо пешниҳод менамоем, ки роҳҳои мошингарди «Чин-Тоҷикистон-Ӯзбекистон» ва «Чин-Тоҷикистон-Афғонистон» ба рӯйхати лоиҳавии ин ташаббус шомил карда шавад.

Самти дигари афзалиятноки ҳамкорӣ бахши энергетика мебошад.

Тоҷикистон дар арсаи ҷаҳонӣ яке аз кишварҳои риоякунандаи принсипҳои «энергияи сабз» эътироф мешавад.

Дар мавриди истифодаи манбаъҳои барқароршавандаи энергия Тоҷикистон дар ҷаҳон ҷойи шашумро ишғол менамояд ва аз рӯи захираҳои оби тозаи ошомиданӣ низ ҷойгоҳи пешсафро дорост.

Дар ҳудуди Тоҷикистон тақрибан 13 000 пирях ва 1 000 дарё мавҷуд аст, ки сарчашмаи ташаккули тақрибан 60 дарсади захираҳои оби Осиёи Марказӣ мебошанд.

Мавҷудияти ин захираҳо барои рушди «иқтисоди сабз» замина фароҳам меоваранд.

Истифодаи муштараки иқтидори бузурги гидроэнергетикии Тоҷикистон имкон медиҳад, ки сатҳи таъминоти кишварҳои минтақа бо неруи барқ ба таври назаррас баланд гардад, хароҷоти истеҳсоли он коҳиш дода шавад, таҳдид ба муҳити зист ва ҳаҷми партобҳои гази карбон ба атмосфера кам карда шавад.

Мо барои ҳамкорӣ дар ин самт ва татбиқи лоиҳаҳои муштарак дар истифодаи ин иқтидорҳо омода ҳастем.

Аз худ кардани беш аз 400 кони канданиҳои фоиданоки дар Тоҷикистон иктишофшуда барои рушди самарабахши саноати маъданҳои кӯҳӣ, металлургияи ранга ва истеҳсоли масолеҳи сохтмонӣ замина мебошанд.

Барои мо ҳамкорӣ дар самти рушди бахши агросаноатӣ, саноати сабук ва хӯрокворӣ низ ояндадор маҳсуб меёбад.

Илова бар ин, Тоҷикистон барои рушди сайёҳӣ имконоти бузург дорад.

Хонумон ва ҷанобон!

Мутмаинам, ки дар доираи ташаббуси «Як камарбанд, як роҳ» мо метавонем рушди муштарак ва некӯаҳволии мардумонамонро таъмин намоем.

Татбиқи муштараки барномаҳо ва лоиҳаҳое, ки ба ҳавасмандгардонӣ ва ҷорӣ намудани моделҳои истеҳсолот ва истеъмол, таъсиси ҷойҳои корӣ, паст кардани сатҳи камбизоатӣ ва нобаробарӣ нигаронида шудаанд, метавонад барои расидан ба ҳадафҳои умумиамон дар ин самт мусоидат намояд.

Дар ин замина моро зарур аст, ки пешниҳодҳо ва лоиҳаҳои худро ҷиҳати азхудкунии муштараки иқтидорҳои мавҷуда ба ҳадди имкон мушаххас намоем.

Ба таваҷҷуҳатон ташаккур!


Сомонаи расмии
Президенти Ҷумҳурии Тоҷикистон

Сомонаи расмӣ Прокуратураи генералии
Ҷумҳурии Тоҷикистон

Вазорати корҳои дохилии
 Ҷумҳурии Тоҷикистон

Агентии назорати нашъовари назди
Презтиденти Ҷумҳурии Тоҷикистон

Кумиати андози назди Ҳукумати
Ҷумҳурии Тоҷикистон

 

ХАДАМОТИ ГУМРУКИ НАЗДИ ҲУКУМАТИ
ҶУМҲУРИИ ТОҶИКИСТОН

 

Агентии Миллии иттилоотии
Тоҷикистон "Ховар"

 

Палатаи савдо ва саноати
Ҷумҳурии Тоҷикистон

 

© АГЕНТИИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯИ ҶУМҲУРИИ ТОҶИКИСТОН , 2013-2019.