Иқтибос аз Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 26.12.2018 | Мо соли ҷорӣ бо мақсади бартараф намудани санҷишҳои беасосу такрорӣ ва фароҳам овардани фазои мусоид барои рушди соҳибкорӣ ба ҳама гуна санҷишҳои фаъолияти соҳибкорони истеҳсолӣ дар давоми ду сол мораторий эълон намудем, ки аз он қариб 2000 субъектҳои соҳибкорӣ дар соҳаҳои истеҳсолӣ бархурдор гардиданд. | Барои тақвият бахшидан ба ин раванд, зарур мешуморам, ки солҳои 2019-2020 тамоми санҷишҳои фаъолияти субъектҳои соҳибкорӣ дар соҳаҳои истеҳсолӣ манъ карда, муқаррароти Қонуни Ҷумҳурии Тоҷикистон “Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ” ба ҳамаи мақомоти санҷишу назорат ва ҳифзи ҳуқуқ, аз ҷумла Прокуратураи генералӣ, Палатаи ҳисоб, Агентии назорати давлатии молиявӣ ва мубориза бо коррупсия, Бонки миллӣ ва мақомоти андозу гумрук татбиқ карда шаванд. | Ба роҳ мондани муборизаи қатъӣ бо амалҳои коррупсионӣ шарти муҳимми фароҳам овардани фазои ҳамдигарфаҳмӣ дар ҷомеа ва таҳкими эътимоди мардум нисбат ба сохтору мақомоти давлатӣ мебошад. | Бинобар ин, Агентии назорати давлатии молиявӣ ва мубориза бо коррупсия, Палатаи ҳисоб, Прокуратураи генералӣ ва дигар субъектҳои ваколатдори соҳа бояд ҳамкориро бо аҳолӣ беҳтар ба роҳ монда, ҷиҳати гузоштани садди устувор дар роҳи амалҳои коррупсионӣ тадбирҳои муассир андешанд. | Ҳамзамон бо ин, якҷо бо Вазорати адлия лоиҳаи Қонуни Ҷумҳурии Тоҷикистон “Дар бораи мубориза бар зидди коррупсия”-ро, ки соли 2005 қабул шудааст, вобаста ба шароити имрӯза дар таҳрири нав таҳия ва пешниҳод намоянд. | Таъмин намудани тартиботи ҳуқуқӣ, амнияти давлат, суботу оромии ҷомеа, ҳифзи ҳуқуқу озодиҳои инсон ва шаҳрванд, инчунин, мубориза бо ҷинояткорӣ вазифаи бевоситаи хизматӣ ва қарзи виҷдонии ҳар як корманди мақомоти ҳифзи ҳуқуқ ба ҳисоб меравад. | Аз ин рӯ, тамоми кормандони мақомоти судӣ, прокуратура, корҳои дохилӣ, амният, агентиҳои назорати маводи нашъаовар, назорати давлатии молиявӣ ва мубориза бо коррупсия бо мақсади таъмин намудани тартиботи ҷамъиятӣ, суботу оромии ҷомеа, пешгирӣ ва сари вақт ошкор кардани ҷиноятҳо, муайян ва бартарафсозии сабабу омилҳои содиршавии онҳо чораҳои ҷиддӣ андешанд. | Барои расидан ба ин ҳадафҳо кормандони мақомоти ҳифзи ҳуқуқ бояд, пеш аз ҳама, худашон талаботи қонунҳоро дар кору фаъолияти хеш қатъиян риоя намоянд ва дар иҷрои вазифаҳои хизматӣ намунаи ибрат бошанд. |

Суханронӣ дар Форуми дуюми байналмилалии «Як камарбанд, як роҳ» доир ба ҳамкории байналмилалӣ

 

Муҳтарам Раис,
Муҳтарам сарони давлатҳо ва роҳбарони ҳайатҳо,
Хонумон ва ҷанобон!

Иҷозат фармоед, пеш аз ҳама, ба Раиси Ҷумҳурии Мардумии Чин ҷаноби Си Ҷинпин барои даъват ҷиҳати иштирок дар Форуми дуюми «Як камарбанд, як роҳ», инчунин барои меҳмондорӣ изҳори сипос намоям.

Имрӯз ҷаҳон рӯ ба рӯи чолишҳо ва таҳдидҳои ҷиддӣ қарор дорад.

Таъсири омилҳои буҳронӣ дар иқтисодиёти ҷаҳон, низоъҳо, таъсири манфии тағйирёбии иқлим ва нобаробарии иҷтимоӣ дар бисёр минтақаҳои ҷаҳон ҳамоно ба инсоният таҳдид мекунанд.

Бо назардошти воқеиятҳои нави ҷаҳонӣ, Ташаббуси «Як камарбанд, як роҳ» саривақтию муносиб мебошад, зеро он манфиатҳои иқтисодии бисёр кишварҳоро таҷассум ва муттаҳид мекунад.

Чунки ҳадафи асосии ин Ташаббус ҳавасмандии рушд ва шукуфоии умум, ки бар принсипҳои истифодаи муштараки афзалиятҳои ҳар як ҷониб барои некӯаҳволии ҳамаи давлатҳои қад-қади Роҳи абрешим асос ёфтааст, мебошад.

Ҳудуди Тоҷикистон, ки дар чорроҳаи машҳури роҳҳои тиҷоратии Шарқу Ғарб қарор дошт, аз даврони қадим дар тиҷорати байналмилалӣ ва рушди муносиботи бисёрасраи кишварҳои Авруосиё ҷойгоҳи хосро ишғол менамуд.

Тоҷикистон Стратегияи миллии рушд барои то соли 2030-ро татбиқ мекунад, ки дар он ҳадафҳои дарозмуҳлати стратегӣ ва рушди афзалиятноки мамлакат дарҷ гардидаанд.

Ҳадафи калидии ин ҳуҷҷат ташаккули модели нави принсипиалии рушди иқтисодӣ тавассути саноатикунонии кишвар мебошад.

Таҷриба, имкониятҳои технологӣ, инноватсионӣ ва сармоягузории кишварҳои иштирокдори Ташаббуси «Як камарбанд, як роҳ» метавонанд дар татбиқи муштараки лоиҳаҳои муҳиму инфрасохтори ояндадор ва истеҳсолӣ истифода шаванд.

Ин, аз ҷумла ба лоиҳаҳои дорои аҳамияти минтақавӣ дар чунин соҳаҳо, ба мисли гидроэнергетика, рушди инфрасохтору коммуникатсия, саноат, бахши кишоварзӣ ва сайёҳӣ дахл дорад.

Тоҷикистон дар соҳаҳои мазкур як қатор афзалиятҳои муқоисавиро дорост.

Тақрибан шаст фоизи захираҳои обии Осиёи Марказӣ дар ҳудуди Тоҷикистон ташаккул меёбанд ва аз рӯи фоизи ҳаҷми истеҳсоли  «нерӯи сабз» аз манбаъҳои барқароршаванда дар ҷаҳон ҷойи шашумро ишғол мекунад.

Мо тасмим дорем, ки ин захираи асосиамонро, ки яке аз заминаҳои бунёдии ташаккули «иқтисоди сабз» мебошад, ба манфиати кишвар ва минтақа истифода барем.

Ҳукумати Тоҷикистон дар ин самт тамоми тадбирҳои заруриро меандешад.

Кишварҳои Осиёи Марказӣ, аз ҷумла Тоҷикистон роҳи баромад ба баҳр надоранд.

Дар ин замина, мо ба таҳия ва татбиқи лоиҳаҳои муштараки инфрасохтории минтақавӣ таваҷҷуҳи хоса зоҳир менамоем.

Дар робита ба ин, мо ба татбиқи лоиҳаҳои бунёди шоҳроҳҳои автомобилгарди «Чин - Тоҷикистон - Ӯзбекистон» ва «Чин - Тоҷикистон - Афғонистон» ҳавасманд мебошем.

Ҳадафи мо дар татбиқи лоиҳаҳои мазкур ташаккул додани долонҳои транзитӣ-нақлиётӣ ба самти бандарҳои баҳрии Осиёи Ҷанубӣ ва Шарқӣ мебошад.

Дар Тоҷикистон беш аз 400 кони канданиҳои фоиданок барои аз худ кардан иктишоф ва омода карда шудаанд.

Мавҷудияти захираҳои бойи табиӣ барои рушди пурсамари гидроэнергетика, саноати маъданҳои кӯҳӣ, металлургияи ранга, истеҳсоли масолеҳи сохтмонӣ, саноати сабук ва хӯрокворӣ асос мебошад.

Бахши кишоварзӣ чун яке аз бахшҳои муҳими стратегии иқтисодиёти Тоҷикистон дар таъмини саноати сабук ва хӯрокворӣ бо ашёи хом аҳамияти калон дорад.

Наваду се дарсади ҳудуди Тоҷикистонро кӯҳҳо ва тақрибан 13 000 пирях, ки миёни онҳо калонтарин пиряхи минтақавӣ - Федченко мебошад, ташкил медиҳанд.

Дар кишвар тақрибан 1000 дарё аз сарчашмаҳо ҷорист ва Тоҷикистон аз рӯи захираҳои оби тозаи ошомиданӣ дар ҷаҳон мавқеи пешсафро ишғол мекунад.

Бо шарофати шароити ҷолиби табиию ҷуғрофӣ ва иқлими мусоид, инчунин мероси нодири таърихию фарҳангӣ Тоҷикистон барои рушди намудҳои гуногуни сайёҳӣ имконоти бузург дорад.

Муҳтарам хонумон ва ҷанобон,

Бо талошҳои муштарак моро зарур аст, бо истифода аз захираҳо ва иқтидори ҳамаи кишварҳое, ки Ташаббуси «Як камарбанд, як роҳ»-ро дастгирӣ мекунанд, воситаҳои нави ҳамгироиро такмил ва ташкил дода, барои наздикшавӣ нуқтаҳои нав ва барои ҳамкории минбаъда роҳҳои навро пайдо намоем.

Ҳамкории ҳамаҷонибаро мебояд фаъолтар ба роҳ монда, дар ин замина муносибатҳои боэътимод ва дӯстонаро байни кишварҳоямон таҳким бахшем.

Ба таваҷҷуҳатон ташаккур!


Сомонаи расмии
Президенти Ҷумҳурии Тоҷикистон

Сомонаи расмӣ Прокуратураи генералии
Ҷумҳурии Тоҷикистон

Вазорати корҳои дохилии
 Ҷумҳурии Тоҷикистон

Агентии назорати нашъовари назди
Презтиденти Ҷумҳурии Тоҷикистон

Кумиати андози назди Ҳукумати
Ҷумҳурии Тоҷикистон

 

ХАДАМОТИ ГУМРУКИ НАЗДИ ҲУКУМАТИ
ҶУМҲУРИИ ТОҶИКИСТОН

 

Агентии Миллии иттилоотии
Тоҷикистон "Ховар"

 

Палатаи савдо ва саноати
Ҷумҳурии Тоҷикистон

 

© АГЕНТИИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯИ ҶУМҲУРИИ ТОҶИКИСТОН , 2013-2019.